Nrk – Nyhende frå Vestland

Politiet har loggført 12 oppdrag knytt til ordensforstyrringar frå russen i Vest politidistrikt i natt. Dette er spreidd utover hele politidistriktet, ifølge operasjonsleiar Frode Kolltveit. – Det er veldig plagsamt, og vi har full forståing for at innbyggjarane reagerer. Det er ikkje måte på korleis enkelte anlegg kan bråke, seier Kolltveit til NRK. Ifølge BT braut fire russebussar ein avtale om å skru av dei utvendige høgtalarane klokka 2 i Hordnesskogen. Kolltveit seier dei likevel har hatt netter med langt fleire oppdrag knytt til russebråk.

I 3-tida i natt vart politiet varsla om ein ruspåverka sjåfør i Måløy. Politiet fann ikkje bilen. Ein time seinare fekk dei eit automatisk varsel om ei trafikkulykke i nærleiken. Tre personar var i bilen. Ifølge politiet løp dei frå staden då politiet kom fram. – Det vart ein kort løpetur. Vi hadde rimeleg fort kontroll på alle tre, seier operasjonsleiar Dan Erik Johannessen til BT. Ein mann i 40-åra er køyrd til sjukehuset i Førde. Vedkommande opplyste å ha smerter i brystet. – Bilførar, ein mann i 20-åra, blåste til over tillaten verdi på alkometeret, melder politiet. Det er store skadar i front på bilen, ifølge politiet. Personen som er køyrd til sjukehus, var passasjer i bilen. Han skal ha vore bak rattet tidlegare på ferda.

Ein mann i 20-åra vart i natt køyrd til Haukeland med kuttskadar i ansiktet. Han vart slått i hovudet av ein mann i 30 åra, som er pågripen av politiet. Politiet fekk melding om hendinga like før klokka 1 i natt.

Nødetatene rykker ut til Jondal, hvor det skal ha brent på et kjøkken. – Brannen er meldt slukket og beboerne er evakuert, melder operasjonsleder i politiet, Steinar Hausvik. Politiet oppretter sak.

Kinn kommune har meld ein person til politiet for det dei meiner er rasistiske utsegn mot ein tilsett i kommunen. Den anmeldte skal ha vore misnøgd med det nye huskestativet i Måløy, som er plassert rett ved eit krigsminnesmerke. Den tilsette skal mellom anna fått høyre at «han ikkje burde vere i landet» og «han burde kastast ut». – Vi meiner utsegna var så grove at vi valde å melde det til politiet. Så blir det opp til politiet å vurdere eventuell reaksjon, seier kommunedirektør Øyvind Bang-Olsen. Bang-Olsen veit ikkje om politiet har teke stilling til saka.